@@ساعدوني.. خطيبتي غير رومانسية @@

ساعدوني.. خطيبتي غير رومانسية

--------------------------------------------------------------------------------

السلام عليكم يا شباب..

أعطيكم القصة من أولها.. الأسبوع الماضي يوم الجمعة عقدت القران على البنت اللي حلمت بها أكثر من سنة.. طبعا هي ما كانت تعرف بحبي لها.. المهم الله سهل وتمت الأمور.. والحين الحمد لله أقول يا شين العزوبية اللي تعبت قلبي طول السنين اللي مضت.

إلى اليوم ما كملنا أسبوع من بدت علاقتنا.. لكن بعد الملكة (عقد القران) صارت زوجتي.. اتصل فيها وتتصل بي.. أزورهم البيت وأشوفها وأسلم عليها..

المشكلة اللي عندي..بصراحة ما عارف سببها ولا اسمها.. بس أعطيكم أعراضها..

- البنت لما أكلمها في التلفون عسل.. ورب الكعبة عسل.. ولما أشوفها في البيت عسل..بس أحيانا أحس إنها ما تفهم في الرومانس.. يعني على سبيل المثال.. هي تدرس أدب.. أسئلها أيش أحلى قصيدة قرأتيها.. يعني لو بنت فاهمة في الرومانس المفروض تقول لي إنها وحدة من قصائد شكسبير أو نزار قباني وتعطيني عنوان قصيدة بحيث إنه أقرأها وأقدر أعرف منها مدى رومانسية البنت..

تدرون حضرتها أيش ردت علي: "في كثير من الأحيان عنوان القصيد ما يدل على مضمونها.. عموماً أحبهم كلهم..وكثير منهم صعب ومعقد"!!!!!!!!!!!!!! يعني كأنها تصرفني وتمشيني!!

- الشي الثاني .. من يوم ما بدأت أرسل لها وترسل لي ما جابت طاري اسمي في رسائلها إلا مرتين.. بينما أنا في كل مرة أكتب "سيدة فلانة"..وأدلع لها اسمها.. وهي حتى طاري اسمي ما تجيبه

- النقطة الثالثة: لما أكلمها في التلفون أنا اللي أبتدي بالسوالف والسؤال عن الدراسة (لأنها بعدها طالبة).. وعن الأهل.. تصدقوا إنها إلى اليوم ما سألتني عن شغلي.. أو دراستي.. أو هواياتي.. أو اهتماماتي.. يعني والله العظيم أبتدي المكالمة وأكر كل الكلام اللي معي خلال خمس دقائق.. وهي بس ترد ردود قصيرة تدل على عدم الاهتمام..

- النقطة الرابعة: أحيانا أرسل لها أسئلها عن موضوع.. ترد علي بطريقة هزلية أو فضة.. وبعدين ترد تعتذر وتحلف لي إنها ما قدرت تتعشى وكل أهل بيتها كانوا خايفين عليها.. وتمدح فيني وتقول لي إني نعمة من الله لها.

- النقطة الخامسة: قبل لا أروح معاهم البيت أتصل فيها أخبرها إني راح أمر.. وأوصل البيت وأحصل أبوها جالس بروحه في المجلس (وعلى فكرة هو رجال أحترمه كثير).. وبعد فترة يمكن 10 دقائق تدخل جايبة العصير أو القهوة.. وتسلم علي وتسألني كيف أخبارك والأهل.. وبعدين تختفي ولا تجلس معانا.. وقبل لا أطلع أطرش أبوها أو أخوها الصغير يناديها علشان أسلم عليها قبل لا أروح..قسم بالله طلعت روحي..

أرجوكم دلوني كيف أتصرف معاها.. كيف أخليها تفهم المجاملات والرومانس..هل أصلا هذا طبيعي خلال أول اسبوع..أيش نصائحكم لي..ترى والله تعبت.